स्पर्श तुझ्या आठवणीचा

 स्पर्श तुझ्या आठवणीचा
मनी वेड लावुनी गेला
पापणीचा उंबरा ओलांडून….
एक अश्रु आज ओघळला..!!

छेडिलेल्या अंतरीच्या तारा
सप्तसुर तो आळवलेला
सुनसान करुनी मैफल….
आज दूरदेशी निघाला..!!

हृदयात आज उमटल्या
पुसलेल्या खुणा पावलांच्या
निःशब्द जणू मनाला….
नकळत चाळवून गेला..!!

चांदणे तुझ्या हास्याचे
स्मरवितो आज मला
विरहाचीच अवघ्या जणू….
कथा ऐकवुनी गेला..!!

कुणी किती अडवावे आता
थांबता तो थाम्बेना
क्षण एक देवूनी भेटीला….
पापणीत जरा रेंगाळला..!!

तो काय जाणो माझी परवड
होती त्याचीच साथ केवळ
धुडकावून नयनाचे बंधन….
लागे दूरस्थ देशीच्या वाटेला..!!

ओलेत्या पापणीचा एकमेव
तो आठवण थेंबही दुरावला
अन अवसेच्या गर्द अंधारी….
माझा चंद्र आज हरवला..!!!!
माझा चंद्र आज हरवला..!!!!

पापणीचा उंबरा ओलांडून
एक अश्रु आज ओघळला….
एक अश्रु आज ओघळला….!!!!